فتح حساب بنك الخرطوم اونلاين
قبل خطوات فتح حساب بنك الخرطوم اونلاين
انواع الحسابات التي توفرها خدمة الاونلاين:
– حساب التوفير العادي Saving
– حساب التوفير المميز Saving Plus
شروط فتح الحساب :-
– الخدمة متاحة حاليا للحسابات الجديدة فقط.
– سوداني الجنسية
– ان لا يقل العمر عن 18 عام
– رقم موبايل نشط
– بريد الكتروني مفعل
المستندات المطلوبة لفتح الحساب:
– جواز سفر سوداني ساري المفعول .
– بطاقة قومية سودانية سارية المفعول .
– شهادة مرتب او رخصة تجارية (في حال حساب التوفير المميز)
خطوات فتح حساب بنك الخرطوم اونلاين
اولا بتختار اللغة
بتنزل رقم هاتفك وايميلك
وبصلك كود ف رقمك بعدها
تبدا تملا الطلب
بطلبو منك اللوكيشن يعرفوك وين
في عملية التحقق مباشر هي بتم طلب فتح الكامرا بتدور يمين مرة وتاني ترجع ترمش وتاني تدور شمال
(هذا اسمة تحقق الهوية )
بعد داك بتدخل العملية للتحقق لكي يتعرفو انك انسان بشري ولا فيديو ولا صورة
بعد داك بترفع اثبات هويتك جواز سفر او بطاقة قومية فقط
بعدها بتم مطابقة الوجه مع الاثبات الذي تم رفعة هذا مع التحقق السابق
بعدها بتملا البيانات اسمك
واسم الوالدة تاريخ الميلاد
وبعدها بتختار الفرع
بعدها بسالوك تفاصيل بتجاوبا
وبعدها بترفع توقيعك اخر شي وبتم ارسال الطلب بتجيك رسالة
في رقمك ان الطلب اترفع وبنريد ليك قريب
العملية كلها في الصور التحت دي
فتح حساب بنك الخرطوم اونلاين
فتح حساب بنك الخرطوم اونلاين
رابط التسجيل https://onlineaccount.bok-sd.com
اسئلة مكررة :
١-بقدر اسجل بي رقم عاملي وكيف يصلني الكود
بتقدر بصلك ف الايميل
٢-هل بقدر افتح حساب مميز وانا عندي توفير عبر الاونلاين ؟
لا م بتقدر الخدمة حاليا للناس الما عندها حساب انت بتمشي الفرع بتفتح حساب مميز
٣- عندي رقم وطني بس بقدر اسجل ؟
لا ما بتقدر المطلوب للاثبات جواز او بطاقة قومية
٤- عمري اقل من ١٨ بقدر اسجل ؟
لا ما بتقدر
٥-جوازي وبطاقتي منتهية بقدر اسجل ؟
لا الا تجددهم
٦-الكود وصلني بعد زمن طويل بقدر استخدمو تاني ؟
لا تطلب كود جديد
٧-وصلني رسالة انو تم فتح حسابك بس ما وصلني كلمة السر ؟
اصبر بتصلك كلمة السر برضو
٨- في زول قال لي اسجل ليك وتدفع لي قروش ؟
التسجيل مجاني وبتسجل براك ومافي وكلاء من البنك بسجلو ليك اونلاين
٩-التوقيع اعملو كيف ؟
تلاتة توقيعات تحت بعض في ورقة A4 بيضاء نضيفة
١٠-خايف اسوط التسجيل اعمل شنو ؟
الموضوع بسيط مافي شي ح تسوطو وحتى لو سوطا مالو اتعلم براك
١١-انا اجنبي بقدر اسجل اونلاين ؟
لا ما بتقدر بتمشي الفرع
١٢-شروط الحساب التوفير او ادخار او مميز شنو ؟
التوفير او الادخار اثبات هوية بس البتحتاجو
المميز اثبات هوية و شهادة مرتب او اسم عمل او سجل تجاري
١٣- سجلت الطلب وجاني مرفوض عشان عندي حساب زمان بس مجمد اعمل شنو ؟
بتصل الفرع حقك فقط دا الحل
١٤- سجلت ومليت الفورم من امس او اول امس او لي تلاتة ايام ما جاني شي ؟
بعد ترسل الطلب بتم المراجعة من قبل موظفين بنك الخرطوم
والمراجعة بالدور القدم اول بتراجع اول ف انت كل العليك تنتظر فقط
لحدي تصلك رسالة انو تم تسجيلك وما محتاج تعيد التسجيل من جديد
١٥- الرابط ما بخش معاي ؟
غير المتصفح لي سفاري او المتصفح الافتراضي ما تستخدم كروم او موزيلا او اوبرا
المصدر : تايلندي اسمر (Thailandy Asmr)